🔷️🔷️RAIA 502 NA ASKARI 16 WALIFARIKI KWENYE GHASIA ZA OKTOBA 29- JAJI CHANDE

Tume ya uchunguzi wa matukio ya uvunjifu wa amani wakati na baada ya uchaguzi Mkuu wa Oktoba 29, 2025, imesema jumla ya watu 518 walipoteza maisha kutokana na ghasia za siku ya uchaguzi Mkuu wa Jumatano ya Oktoba 29, 2025.

Kwa mujibu Mwenyekiti wa Tume hiyo Jaji Mkuu Mstaafu Mohamed Othman Chande leo Aprili 23, 2026 Ikulu Jijini Dar Es Salaam wakati akiwasilisha ripoti hiyo kwa Rais Samia Suluhu Hassan, Jaji Chande amesema watu 182 walifariki dunia Mkoa wa Dar es Salaam, Mwanza 90, Mbeya 80, Arusha 53, na mikoa mingine watu 113.

“Tathmini ya Tume ni kuwa jumla ya vifo vilivyotokana na ghasia za Uchaguzi Mkuu ni 518, ambapo, wanaume ni 490, sawa na asilimia 94.6 na wanawake ni 28, sawa na asilimia 5.4. Vingi kati vya vifo hivyo vilikuwa sio vya kawaida (unnatural). Mkoa wa Dar es Salaam ulikuwa na vifo vingi zaidi, ukiwa na vifo 182, ikifuatiwa na Mkoa wa Mwanza vifo 90; Mbeya vifo 80; na Mkoa wa Arusha vifo 53.”

"Kati ya vifo hivyo 518, ishirini na moja (21) vilikua vya watoto. Katika kundi hilo, 15 walikuwa watoto wenye umri kati ya miaka 15 – 17, wanne (4) walikuwa na umri kati ya miaka 7 - 10, na wawili (2) umri chini ya miaka mitano.

“Vifo 502 sawa na asilimia 96.9 vilikuwa vya raia (civilians), na 16 sawa na asilimia 3.1 vilikuwa vya maafisa na askari wa vyombo vya ulinzi na usalama.”

“Kati ya watu 518 waliofariki, 373 walifikishwa hospitali wakiwa wamefariki, majeruhi 121 walifariki wakati wakiwa wanapatiwa matibabu, na maiti 24 hakuna taarifa kutoka vituo vya kutolea huduma za afya. Kati ya Maiti 518, maiti 480 sawa na asilimia 92.7 zilitambuliwa na kuchukuliwa na ndugu na familia.” Amesema Jaji Chande